Бс, 15/02/2018 - 10:13
Жақып Асанов Сот төрелігі академиясын одан әрі дамыту мәселелерін талқылауға арналған «дөңгелек үстел» жұмысына қатысты.
Кездесуге Жоғарғы Соттың судьялары, Соттардың қызметін қамтамасыз ету департаментінің басшылығы, ЖОО-ның профессор-оқытушылар құрамы, Қазақстан Республикасы Президентінің жанындағы Мемлекеттік басқару академиясының және БҰҰ Даму бағдарламасының өкілдері қатысты.
Ректор Төлеш Қаудыров ЖОО қызметі туралы айта келе, Академияда жыл сайын 600-ден астам судья мен сот қызметкерлері қайта даярлау және біліктілікті арттыру курстарынан өтетіндігін хабарлады. Ол отандық сот төрелігі жүйесін жетілдіруге бағытталған бірқатар ғылыми-зерттеу жобаларының іске асырылып жатқанын және магистранттардың шет елдерде тағылымдамадан өтетіндігін атап өтті.
Кездесуде Ж.Асанов Академияның оқу және ғылыми-зерттеу бағдарламаларын одан әрі жетілдірудің нақты стратегиясын әзірлеу қажеттігіне тоқталды. «ЭЫДҰ-ға мүше елдердің тәжірибесін мұқият зерделеп, сот жүйесі үшін мамандар даярлаудың неғұрлым тиімді тәсілдерін қолдану қажет», - деді ол.
«Дөңгелек үстел» барысында БҰҰДБ-ның «Сот төрелігі академиясының оқыту инфрақұрылымына қажеттіліктерді бағалау» жобасының жетекшісі Эдуард Захарченко ЭЫДҰ-ға мүше мемлекеттердің тәжірибесін ескере отырып, оқу процесін одан әрі дамыту жөніндегі бірқатар ұсыныстарын айта келе, ЖОО-да оқытудың тиімділігі туралы әлеуметтік зерттеу қорытындыларымен таныстырды.
Ж.Асанов іс-шараны қорытындылай келе, Академия басшылығына кездесуде айтылған ұсыныстар мен ұсынымдарды ескере отырып, ЖОО-ны одан әрі дамыту стратегиясын әзірлеуді тапсырды.